სპექტრი. გაზეთი ,,სპექტრი" მეხუთე კლასელი გიორგი ჯოხაძის წარმატებებით დაინტერესდა, რომელიც საქართველოს საბრძოლო ხელოვნებათა კონფედერაციის გურჯაანის ჯიუ კუმიტეს კლუბ ,,ამირანის" სპორტსმენია. ის სულითა და გულით დაეუფლა საბრძოლო ხელოვნებას და ბოლო ორ წელიწადში 3-ჯერ მოიპოვა ჩემპიონის ტიტული კიკ-ბოქსინგში. 1 წლის წინ იგი კონფედერაციის წევრი გახდა და მე-7 კიუს წოდება მიანიჭეს. ქ. გურჯაანის #1 საჯარო სკოლის მეხუთე კლასის მოსწავლეს გიორგი ჯოხაძეს საქართველოს სხვადასხვა რანგის შეჯიბრებებში არაერთი გამარჯვება აქვს მოპოვებული. ,,ორი წელია, რაც სპორტული ცხოვრება დავიწყე. კიკ-ბოქსინგით ვარ დაინტერესდებული და ჯიუ კუმიტეს წესებითაც ვვარჯიშობ.Gვარ ოქროს მედლის მფლობელი, ასევე გამაჩნია სპორტული თანრიგი მე-7 კიუ (თავისუფალი ორთაბრძოლები). მომავალში მსურს საქართველოს საზღვრებს გავცდე და მსოფლიო ჩემპიონი გავხდე."

,,სპექტრი" გაესაუბრა გურჯაანის ჯიუ კუმიტეს კლუბის ინსტრუქტორს, შავი ქამრის, I - დანის მფლობელს ამირან ანჯაფარიძეს. იგი გურჯაანის კლუბ "ამირანის" ხელმძღვანელია, რომელიც საქართველოს საბრძოლო ხელოვნებათა კონფედერაციის პრეზიდენტის კახა ბასილიას თანადგომით დაარსდა. მისი აღზრდილი სპორტსმენები ყოველთვის საპრიზო ადგილებზე გადიან. ახლახანს საქართველოს საბრძოლო ხელოვნებათა კონფედერაციის გადაწყვეტილებით, მას სპორტის ოსტატის წოდება მიანიჭეს. ,,მე როგორც პირადი მწვრთნელი, ვხედავ, რომ გიორგი ჯოხაძეს კარგი მომავალი ექნება. ის დისციპლინირებული, კეთილი და როგორც ქრისტიანს შეეფერება, თავმდაბალი ბიჭია. მე დიდ მადლობას ვუხდი მის პედაგოგებს გაწეული ღვაწლისათვის. მათ ხელი შეუწყეს გიორგის ვაჟკაცურ და შრომისმოყვარე ადამიანად ჩამოყალიბებას," _ აღნიშნა ამირან ანჯაფარიძემ. გიორგი ჯოხაძე სკოლაშიც წარმატებული მოსწავლეა. ,,გიორგი სწავლითაც და დისციპლინითაც გამორჩეულია. კეთილი და მეგობრული ბიჭია. თავს არავისზე წინ არ დააყენებს, დახმერებაზე უარს არავის ეუბნება. თანაკლასელებს ყოველთვის უხარიათ მისი სპორტული წარმატებები," _ აღნიშნა #1 საჯარო სკოლის მასწავლებელმა ნინო მღებრიშვილმა.