სპექტრი. თელავში მუსიკის დღეები გაიმართა. ორი დღის განმავლობაში თელავის ნ. სულხანიშვილის სახელობის მუსიკალურ სასწავლებელში რამდენიმე საკონცერტო პროგრამა შესრულდა. ღონისძიებაში მონაწილეობა მიიღეს შვეიცარიელმა მუსიკოსებმა ელენე შულტჰესმა და თომას ჰოიზერმანმა. მათ წარმოადგინეს შვეიცარული და ქართული მუსიკა ფლეიტასა და ფორტეპიანოსთვის. კონცერტზე შესრულდა ფრანკ მარტინის, როლანდ მოზერის, გასპარ ფრიცის, ოთმარ შოეკის, თეო ვეგმანის და ოთარ თაქთაქიშვილის მუსიკალური ნაწარმოებები. მუსიკის Dდღეების ფარგლებში თელავში კიდევ ერთი, ვოკალური მუსიკის კონცერტი გაიმართა. მასში მონაწილეობდნენ ბარიტონი გოჩა აბულაძე და ტენორი მამუკა მანჯგალაძე. მათ ქართველი და უცხოელი კომპოზიტორების ნაწარმოებები შეასრულეს. თელავში მუსიკის დღეების ორგანიზატორი იყო თელავის მუნიციპალიტეტის გამგეობის კულტურის სამსახური. „ჩვენმა უცხოელმა სტუმრებმა აქ ჩამოსვლის ინიციატივა თავად გამოიჩინეს. მოხარულები ვართ, რომ თელავს ასეთი საინტერესო მუსიკალური დღეები აჩუქეს. რაც შეეხება ჩვენ როლს ამ კონცერტში, მხოლოდ მისი საინფორმაციო მხარდაჭერა უზრუნველვყავით,“ _ აღნიშნა კულტურის სამსახურის ხელმძღვანელმა მიხეილ დაღუნდარიძემ.