სპექტრი. განათლებისა და მეცნიერების სამინისტროს ინფორმაციით, პედაგოგთა სერტიფიცირება, რომელიც აქამდე რამდენჯერმე გადაიდო, 13 ივლისს დაიწყება. აღნიშნულის შესახებ განცხადება მასწავლებლებისთვის მოულოდნელი აღმოჩნდა, რამაც მათი უკმაყოფილება გამოიწვია. 13 ივლისს პედაგოგებს გამოცდის ჩაბარება პროფესიულ უნარებში მოუწევთ. სერტიფიცირების დაწყების ზუსტი თარიღი სწორედ ერთი თვით ადრე გახდა ცნობილი. რეგისტრაციის მიმდინარეობისას სავარაუდო დღედ 28 ივლისი სახელდებოდა. მას შემდეგ, რაც რეგისტრაციის ვადა აპრილის ნახევრამდე გაგრძელდა, გამოცდების ჩატარების სავარაუდო თარიღად 5 აგვისტო დასახელდა. ამიტომაც პედაგოგთა უმრავლესობა ზემოთ აღნიშნულ ინფორმაციას უკმაყოფილოდ შეხვდა. ზოგიერთ მათგანს ჯერ გადამზადებაც არ დაუმთავრებია და კვლავაც ტრენინ-კურსებს გადის. ისინი ამბობენ, რომ სათანადოდ მოსამზადებლად დრო არ ეყოფათ, რადგან პარალელურად საგაკვეთილო პროცესშიც იყვნენ ჩართულნი.