სპექტრი. დაწყებითი კლასის დამთავრება და პირველ მასწავლებელთან გამოთხოვება სოფელ გურჯაანის საჯარო სკოლის IV კლასის მოსწავლეებმა ხელმძღვანელის ვისელი სეფიაშვილის ღონისძიებით აღნიშნეს. დაახლოებით ერთი საათის განმავლობაში მათ მსმენელები ლექსებით, ცეკვებით, სიმღერებით და სახალისო ინსცენირებებით გაამხიარულეს. თუმცა ზეიმს თავისებური სევდა მაინც ახლდა, ისინი ხომ პირველ მასწავლებელს ეთხოვებოდნენ, რომელმაც შეასწავლათ  "აი ია". განსაკუთრებით გულისამაჩუყებელი ღონისძიების დასასრული აღმოჩნდა, როცა ვისელი სეფიაშვილმა მათ ოთხი კლასის დამთავრება და ცხოვრების ახალ ასპარეზზე გადასვლა მიულოცათ. "ჩემთვის მეტად მიშვნელოვანია ის 4 წელი, რომელიც თქვენს აღზრდასა და განათლების მიღებაში თვალსა და ხელს შუა გამიფრინდა. მინდა მოგილოცოთ ცხოვრების ახალ ასპარეზზე გადასვლა, მაგრამ გული მწყდება, რომ კვლავინდებურად ყოველდღე ვერ ვნახავ თქვენს მომღიმარ სახეებს, იმედიან, ხალისიან და ჭკვიან თვალებს. თუმცა გულს ის მიმშვიდებს, რომ სკოლაში ხშირად შეგხვდებით და მოგეფერებით," _ აღნიშნა მან. მოწვეული სტუმრები ღონისძიებით კმაყოფილები დარჩნენ და დადებითად შეაფასეს. საჯარო სკოლის დირექტორმა რუსუდან მამულაშვილმა ბავშვებს წარმატებებისკენ მიმავალი გზა დაულოცათ.