სპექტრი. გურჯაანის მუნიციპალიტეტის მაღალმთიან სოფელში, სადაც დაახლოებით 55 ადამიანი ცხოვრობს, პრობლემები ყოველდღიურად მატულობს. საკრებულოს სესიაზე სოფლის მაჟორიტარმა დეპუტატმა ნუკრი ჩიბარაშვილმა ჭერმის ყოფნა-არყოფნის საკითხი დააყენა. "სოფლის ყოფნა-არყოფნის საკითხი დაკავშირებულია ინფრასტრუქტურულ პრობლემებთან. საქმე ეხება ჭერმის რაიონული ცენტრთან დამაკავშირებელ გზას, ასევე გადაუჭრელია ელექტროენერგიის საკითხი. უნდა ითქვას, რომ ორი ათეული წელი გახდება, რაც სოფელში დენი არ არის, ანუ ადგილობრივი მოსახლეობა ყველაფერს მოწყვეტილია. გარდა ამისა, იქ ცხოვრობს ექვს წლამდე ასაკის ათი ბავშვი, რომელთა ვაქცინაცია სავალდებულოა, მაგრამ ეს პროცესი საერთოდ ვერ სრულდება, რადგან მოძველებულ ამბულატორიაში ვაქცინის შენახვისთვის შესაბამისი პირობები არ არსებობს. მართალია, ამ საკითხს თავად მშობლები ყურადღებით ეკიდებიან და ზოგს გურჯაანის პოლიკლინიკაში მიჰყავს შვილი, მაგრამ ამის საშუალება ყველას არ აქვს. სოფელში სულ ორი-სამი მანქანაა და ტრანსპორტირება ძალიან ჭირს. ჭერემში დაახლოებით 55-მდე მოსახლე, 20-მდე ოჯახია. ჭერმის პრობლემების შესახებ საკრებულოს სესიაზეც ვისაუბრე და როგორც აღნიშნეს, გზის რეაბილიტაციისთვის სპეციალური ტრანსფერით გარკვეული თანხა განისაზღვრა. იმედია, რომ აღნიშნული საკითხები ეტაპობრივად მოგვარდება," _ განმარტა ნუკრი ჩიბარაშვილმა და აქვე იმაზეც ისაუბრა, რომ გასულ წელს სოფლისთვის შეძენილი მაღალგამავლობის ტრანსპორტი საწვავისა და და საბურავების უქონლობის გამო, ვერ მოძრაობს, რადგან მისი ხარჯები არ არის გათვალისიწნებული, სოფელს კი ამის შესაძლებლობა არ აქვს.

ადგილობრივი ხელისუფლების წარმომადგენლების თქმით, სოფელ ჭერმის პრობლემების მოგვარებაზე მუშაობა აქტიურად მიმდინარეობს. "ის საკითხები, რაც ჭერემის მოსახლეობას აწუხებს, უსათუოდ გადაიჭრება. გზა, ტრანსპორტი, ელექტროენერგია და ელემენტარული ინფრასტრუქტურული საკითხები მოგვარებას საჭიროებს და ამაზე მუშაობა უკვე დაწყებულია. გამგეობის შესაბამისმა სამსახურებმა უნდა წარმოადგინონ ის მინი პროგრამა, რომელიც აუცილებლად სჭირდება ამ სოფლის არსებობას და იქ მაცხოვრებლებს. ეს არის პირველ რიგში დენის, ტრანსპორტირებისა და მედიკამენტები პრობლემის გადაწყვეტა. მე მხარს ვუჭერ აღნიშნულ წინადადებას და ალბათ მივაღწევთ, რომ უახლოეს მომავალში ბიუჯეტში შევიდეს ცვლილება, გამოიყოს გარკვეული თანხა, რომ ამ სოფლის მოსახლეობის საყოფაცხოვრებო პირობები გაუმჯობესდეს," _ განმარტა გურჯაანის მუნიციპალიტეტის საკრებულოს თავმჯდომარის მოადგილემ ალექსანდრე სირბილაშვილმა.