სპექტრი. რამდენიმე დღის წინ გურჯაანის მუნიციპალიტეტის საკრებულოს მორიგი სესია გაიმართა, რომელზეც ერთ-ერთი მნიშვნელოვანი საკითხი 2010 წლის ბიუჯეტში ცვლილებების განხორციელება იყო. უნდა აღინიშნოს, რომ ერთი შეხედვით უმნიშვნელო ცვლილებების ფონზე ზოგიერთ მუხლში გარკვეულწილად თანხების ზრდა შეინიშნება. მაგალითად: `გურჯაანის მუნიციპალიტეტის გამგეობის ხარჯები განისაზღვროს 974.5 ათასი ლარით, ნაცვლად 966.5 ათასი ლარისა (მუხლი2, ბ.); გამგეობის აპარატის ხარჯები განისაზღვროს 292.0 ათასი ლარით, ნაცვლად 284.0 ათასი ლარისა. ადგილობრივი მნიშვნელობის (საავტომობილო) გზების მშენებლობა, რეკონსტრუქცია და ექსპლოატაციის ხარჯები განისაზღვროს 1114.5 ათასი ლარით, ნაცვლად 1041.0 ათასი ლარისა. სოფლის მეურნეობა, მათ შორის სარწყავი არხებისა და ნაპირსამაგრი ნაგებობების მოწყობა, რეაბილიტაცია და ექსპლოატაციის ხარჯები განისაზღვროს 164.0 ათასი ლარით, ნაცვლად 79.0 ათასი ლარისა, მუნიციპალიტეტის ტერიტორიაზე ხევების გაწმენდისა და ნაპირსამაგრი სამუშაოები დაფინანსდეს 129.0 ათასი ლარით, ნაცვლად 20.0 ათასი ლარისა~ და ა.შ _ ვკითხულობთ `გურჯაანის მუნიციპალიტეტის 2010 წლის ბიუჯეტის დამტკიცების შესახებ~ ცვლილებებისა და დამატებების შეტანის თაობაზე მუნიციპალიტეტის საკრებულოს დადგენილებაში.

"საკრებულოს სხდომაზე ერთ-ერთი მთავარი საკითხი იყო ადგილობრივ ბიუჯეტში ცვლილებების შეტანა და ძირითადად იმ მიზნობრივი დამატებითი თანხების შემოსვლას შეეხო, რომელიც ადგილობრივი ინფრასტრუქტურის განვითარების შემდგომ პერსპექტივებს ითვალისიწნებს. ეს არის შიდა გზების, წყალმომარაგების ქსელების, სათავე ნაგებობების რეაბილიტაცია, ნაპირსამაგრი სამუშაოები, ღვარსადენების მოგვარება და ა.შ. ეს საკითხები დღეს ყველაზე ძალიან აწუხებს ჩვენს რაიონს. იცით, რომ გაზაფხულზე მოსულმა ჭარბმა ნალექებმა და სტიქიამ სერიოზული ზარალი მიაყენა თითქმის ყველა სოფელს, მეტნაკლებად ყველაგან არის წყლების სათავე ნაგებობის, შიდა ქსელების, მილების, ღვარსადენების დაზიანება, ასევე მეწყერული პროცესები, რომელმაც დააზიანა იმ სოფლებს შეუქმნა პრობლემები, რომლებიც ჭარბტენიან მიდამოებშია განლაგებული და ხევები ესაზღვრება. ამ მიმართულებით სპეციალური ტრანსფერით 250 ათას ლარზე მეტია განსაზღვრული. ეს არის სოლიდური თანხა, რომელიც პროპორციულად გადანაწილდება ამ სამუშაოების შესასრულებლად," _ განმარტა გურჯაანის მუნიციპალიტეტის საკრებულოს თავმჯდომარის მოადგილემ ალექსანდრე სირბილაშვილმა.

საკითხი, რამაც ოპოზიციური პარტიის წარმომადგენლის ინტერესი გამოიწვია არასამეწარმეო (არაკომერციული) იურიდიული პირის `ველისციხის თეატრის~ დაფინანსება იყო, რომლის თანხაც ნაცვლად 30.0 ათასი ლარისა 31.5 ათასი ლარით განისაზღვრა. "მაინტერესებდა ა.ი.პ.ი-ების თანადაფინანსების გაზრდის დროს იყო თუ არა გათვალისიწნებული მათი შემოსავლები. რა თქმა უნდა, არც ერთი ამის წინააღმდეგი არ ვარ, მაგრამ გასათვალისწინებელია რის ხარჯზე ხდება ეს ცვლილება," _ განმარტა "გიორგი თარგამაძე, ინგა გრიგოლია _ ქრისტიან დემოკრატიული მოძრაობის~ თავმჯდომარემ გურჯაანში, საკრებულოს წევრმა ნინო მურაკაშვილმა.

საკრებულოს თავმჯდომარის მოადგილის განმარტებით კი ა.ა.ი.პ-ების დაფინანსების კუთხით ერთი გამონაკლისი ველისციხის კულტურის სახლი იყო, რომელიც ძლიერი წვიმების დროს მნიშვნელოვნად დაზიანდა. "აღნიშნული მიმართულებით გამოიყო დაახლოებით 1500 ლარი. როგორც ვიცი, ხშირი წვიმების დროს შენობის ჭერი დაზიანდა და ეს არის ის მინიმალური თანხა, რომელიც სახურავის რეაბილიტაციას მოხმარდება. ფინანსები `სხვა ხარჯებიდან~ გამოიყო, რომელიც კაპიტალური ხარჯებისთვის არის გათვალისწინებული. ჩემი აზრით, ეს თანხა ალბათ სხვა სამუშაოებს მოაკლდა და იმ მიმართულებით განისაზღვრა, რაც უფრო მნიშვნელოვანი და გადაუდებელია," _ აღნიშნა ალექსანდრე სირბილაშვილმა.