,,ბორჯომი~. რა დრო გასულა, ჩვენო უჩა, ცხოვრების შუადღე ისე მოგეპარა, ვერც კი გავიგეთ. 60 წლის გამხდარხარ, შენი მეგობრები და კოლეგები სულით და გულით გილოცავთ ამ ღირსახსოვარ თარიღს, ამ ასაკიდან ადამიანები თავდაღმა ეშვებიან, მაგრამ შენ ისეთი მაგარი ჯიშისა და ჯილაგის გამოდექი, იმდენ გაჭირვებასა და მეხთატეხას გაუძელი, შენი თავქვე სიარული ვინა სთქვა, ჯერ კიდევ დიდი შემოქმედებითი აღმართი გაქვს ასავლელი. შენი ლიტერატურული წერილები, ლექსები, პროზაული ნაწარმოებები თუ ჟურნალისტური ჩანახატები გულგრილს არავის ტოვებს.
გვახარებს შენი წარმატებები, ეს რა შესანიშნავი წიგნი მიუძღვენი შენი დაბადების საიუბილეო თარიღს, სახელიც დიდებული შეგირჩევია _ ,,არაგვის ხეობიდან _ მტკვრის ხეობამდე~. ყოჩაღ!
არაგვის ხეობაში დაიბადე. ბავშვობის და ყრმობის წლები იქ გაატარე, იქ შეიგრძენი ვაჟას ლექსების ძალა და სიდიადე, ხოლო ბორჯომის ხეობამ დაგავაჟკაცა, ცხოვრება გასწავლა, აქ შეიძინე უამრავი მეგობარი და ნაცნობი.
დღეს ორი ხეობის და სრულიად საქართველოს ერთგული მსახური ხარ, აკი შენი წიგნის ბიოგრაფიულ ,,ინტერმეცოში~ ხატოვნად მიუთითებ ,,60 წელი, რომ იტყვიან, ისე წამომეპარა, უკან მოხედვა ,,ძლივს~ მოვასწარი და, აი, მთელი ჩემი ,,სულიერი ნაღვაწი~ ერთობლივად მოვათავსე ამ წიგნში~...
ღმერთმა დაგლოცოს ასეთი კარგი წიგნისთვის, მკითხველი ამ წიგნში ბევრ საგულისხმოს იპოვის, მთავარი კი მაინც ისაა, რომ შენ იყავი და ხარ სიკეთის, სიყვარულის, მეგობრობისა და სამართლიანობის მსახური, ქომაგი და მოამაგე, ეს კი ბევრს ნიშნავს ჩვენს ჯერ კიდევ დაულაგებელ ცხოვრებაში.
ხომ გახსოვს პოეტის სიტყვები: ,,...კაცად შერჩე ამ ქვეყანას, ესეც დიდი გმირობაა თურმე~.
შენ ნამდვილად კაცურად, ღირსებით სავსე, ამაყად დადიხარ ბორჯომის ქუჩებში, მაგრამ გახსოვდეს, ჯერ კიდევ ქვეყნის ვალი გაქვს მოსახდელი, ჯერ კიდევ ბევრი საქმეა საკეთებელი, რომელიც ბორჯომს და სრულიად საქართველოს სასიკეთოდ უნდა გაიღო, სიბერე კი კიდევ მოიცდის.
დიდხანს სიცოცხლეს, შემოქმედებით წარმატებებს და ღვთის წყალობას გისურვებ, შენს კალამს ჟანგი არ მოსდებოდეს, გეხაროს ოჯახში და მეგობრებში, მრავალი იუბილე გადაგეხადოს და შენი ნიჭის თაყვანისმცემლების გულები მომავალშიც გაგეხარებინოს.