სპექტრი. აგვისტოს ბოლოს თელავში აკვაპარკის მშენებლობის მხოლოდ პირველი ეტაპი დასრულდა, რომელიც 27 აგვისტოს გრანდიოზული კონცერტით გაიხსნა. პროექტის ინიციატორი კახეთის მხარეში სახელმწიფო რწმუნებული-გუბერნატორი გიორგი ღვინიაშვილია. სამუშაოებს შპს "ევროპარკი" ასრულებს.

მიუხედავად იმისა, რომ აკვაპარკის სამშენებლო სამუშაოები გარკვეული ხარვეზებით მიმდინარეობდა (გაზეთი `სპექტრი~ ამ საკითხზე გასული წლის 3-10 დეკემბრის #25(264)-ში და მიმდინარე წლის 14-21 ივლისის #18(284)-ში წერდა), შპს `ევროპარკმა~ მოახერხა და პროექტის პირველი ეტაპი დაპირებისამებრ 2010 წლის ზაფხულის მიწურულს დაამთავრა. როგორც გუბერნიაში განმარტავდნენ, თუ სამუშაოები აღნიშნულ ვადაში არ შესრულდებოდა, დაწესდებოდა შესაბამისი სანქცია და ინვესტორს ობიექტს ჩამოართმევდნენ.

 

კახეთის მხარეში სახელმწიფო რწმუნებული-გუბერნატორი გიორგი ღვინიაშვილი აღნიშნავდა, რომ ინვესტორი ნაკისრ ვალდებულებას ბოლომდე შეასრულებდა. "როგორც კი სამუშაოები დასრულდება, მოხდება ამ ობიექტის გახსნა. ჩვენი სურვილია, თელაველებს რაც შეიძლება კომფორტული აკვაპარკი ჰქონდეთ."

მუშების, სანახევროდ დასრულებული გაზონებისა და ჯერ კიდევ გამოსაშრობი ცემენტის სუნის თანხლებით 27 აგვისტოს გაიხსნა სამი აუზი და ორი ატრაქციონი.

მიუხედავად იმისა, რომ ქართული ესტრადის ვარსკვლავები სახელდახელოდ მოწყობილი სცენიდან დამსწრე საზოგადოებას ამხნევებდნენ, ბარი კი ლუდითა და სხვადასხვა სასმელებით უფასოდ უმასპინძლდებოდა სტუმრებს, კრიტიკული კომენტარები სხვადასხვა მხრიდან მაინც ისმოდა. პარალელურად, საზოგადოებაში გავრცელდა აზრი, რომ ატრაქციონები თბილისის აკვაპარკში  მოხსნეს და თელავში მეორადი მოხმარებისთვის დაამონტაჟეს.

აღნიშნული საკითხის გასარკვევად შპს `ევროპარკის~ იურისტს სალომე სალუქვაძეს მივმართეთ, რომელიც თავდაპირველად ჩვენი წყაროს ვინაობით დაინტერესდა, შემდეგ ისიც გვითხრა: `ასეც რომ იყოს რა პრობლემაა? თუმცა მე ამ ინფორმაციას არ ვადასტურებ."

თელავის აკვაპარკის პროექტი 1 მლნ 800 ათასი დოლარის ღირებულებისაა და შპს "ევროპარკის" იურისტის სალომე სალუქვაძეს თქმით, ჯერჯერობით დაუზუსტებელია პირველი ეტაპისთვის რა თანხაა გახარჯული.