გარემოს დაცვისა და ბუნებრივი რესურსების სამინისტროს დასავლეთ საქართველოს სამმართველოს უფროსი თეიმურაზ კეპულაძე აცხადებს:      „ეს ადგილი დღეს შემოღობილი და დანიშნულია. 10 სანტიმეტრის რადიუსით ვიცით, ცეზიუმი სადაც დევს. ამ ეტაპზე მიდის მეცნიერული დამუშავება, თუ როგორ უნდა მოხდეს მისი გატანა. ეს უკვე საგანგებო სიტუაციათა სამსახურის პრეროგატივაა. გამაფრთხილებელი წარწერებიც გაკეთებულია." 

ადგილი, სადაც ცეზიუმის წყარო აღმოაჩინეს, საცხოვრებელი არ არის. როგორც სპეციალისტები ამბობენ, დაახლოებით 50 მეტრის რადიუსის შემდეგ რადიაციის ფონი ნორმაში ჯდება. მათივე მტკიცებით, მოსახლეობას საფრთხე არ ემუქრება. თუმცა დღემდე გაურკვეველია, თუ საიდან და რა გზით შეიძლებოდა მოხვედრილიყო ცეზიუმი კოპიტნარის ტერიტორიაზე. ამ ეტაპზე მხოლოდ ვარაუდებია. „ჩემი ვარაუდით, ეს არის შემთხვევით გზაზე დადებული ცეზიუმი. აქამდე რაც ვნახეთ, ყველა ცეზიუმი, შემთხვევით იყო ნაპოვნი და შემდეგ ამოღებული - იგი ხელსაწყოს დაშლის შემდეგ უცოდინარობის გამო გადააგდეს. როგორც ჩანს, ასეთივე სახის ხელსაწყო ვიღაცამ მოიპარა და დაშლის შემდეგ მოხვდა იქ. გარდა რუსული ბაზისა, აეროპორტიც ჩვენ გადმოგვეცა და ძნელი სათქმელია ეს სამხედრო ნაწილიდან არის მოპარული, თუ სამოქალაქო აეროპორტიდან," - აცხადებს თემურ კეპულაძე.

თუმცა სამხედრო ბაზები, რომლებიც რუსებმა დატოვეს, როგორც გარემოს დაცვის სამინისტროში აცხადებენ, თავის დროზე შესაბამისმა სამსახურებმა შეამოწმეს. კოპიტნარის ტერიტორიაზე აღმოჩენილ ცეზიუმს, სავარაუდოდ, უახლოეს დღეებში გაიტანს საგანგებო სიტუაციათა სამსახური სპეციალური კონტეინერით, სპეციალისტების ერთობლივი მუშაობის შემდეგ. თუმცა, სად იქნება ახლადაღმოჩენილი ცეზიუმის ახალი ბინა, კვლავ სახელმწიფო საიდუმლოებაა.

P.S. აქამდე აღმოჩენილი (ხონის რაიონის სოფელ მათხოჯისა და საღორიის ტერიტორიაზე) „ცეზიუმ 137"-ის შენახვის ადგილი დღემდე გასაიდუმლოებულია.