საქართველოს პრეზიდენტის ვოიაჟებს _ ახალი საავადმყოფოებისა თუ სხვა ობიექტების გახსნის პომპეზურ ცერემონიალებს ოპოზიციამ პოლიტიკური პარტიების, პოლიტიკოსების, ექსპერტებისა და მასმედიის არადეკვატურად დაფინანსება დაუპირისპირა. `ფლიპკამერაში~ აღნიშნულ საკითხებზე სასაუბროდ რესპუბლიკური პარტიის რეგიონული ორგანიზაციის ხელმძღვანელი ტიფო მიქატაძე და `თავისუფალი დემოკრატების~ რეგიონული ორგანიზაციის ხელმძღვანელი თემურ სალუქვაძე იყვნენ მოწვეულნი.

_პოზიციისა და ოპოზიციის მკვეთრი დაპირისპირების შემდეგ ეს ყველაფერი _ ხელისუფლების მხრიდან რეგიონებში ვოიაჟი და ოპოზიციის მხრიდან პიარკამპანიებისა თუ რეკლამებისთვის წინასწარ არაადეკვატური ფინანსების გაღება, მხედველობაში გვყავს `ქართული ოცნების~ დამფუძნებელი და ხელმძღვანელი, ბატონი ბიძინა ივანიშვილი, შეიძლება ლოგიკური იყოს, მაგრამ მხარეები თავიათი ქმედებებით ხომ არ გაცდნენ დასაშვებ ზღვარს, თუ ასეთი ზღვარი არსებობს ზოგადად მაინც?
ტიფო მიქატაძე: _`რაც შეეხება პოზიციისა და ოპოზიციის გაჩაღებულ ბრძოლას, როგორც თქვენ ბრძანეთ, ბუნებრივია და ბუნებრივია იმიტომ, რომ ძალიან მნიშვნელოვანი არჩევნები გველის. ეს არის უმნიშვნელოვანესი პოლიტიკური მოვლენა, რომელიც წინ ელოდება ჩვენს საზოგადოებას, გამომდინარე იქედან, რომ ოპოზიცია ბოლო წლებში, როგორც არასდროს, სერიოზული ფავორიტის როლში გამოდის და ბუნებრივია ინტერესი და მოლოდინი საზოგადოებაში ძალიან მაღალია. დამერწმუნეთ, წელს არჩევნებამდე თითოეული წუთი, თითოეული დღე, მოქმედება, აღარაფერს ვამბობ პიარ კამპანიებზე, გათვლილი იქნება საარჩევო შედეგებზე, ეს მოულოდნელი არ არის, ამისთვის მზად უნდა ვიყოთ ყველა.
თემურ სალუქვაძე: `ეს რეჟიმი თავად ხელისუფლებამ შესთავაზა საზოგადოებას. თქვენ იცით, როგორი ტემპერამენტითა და რა ტემპებით აწარმოებს შეხვედრებს. მით უფრო, რომ ჯერ კიდევ ცხრა თვე არის წინ დანიშნულ არჩევნებამდე. ის ფაქტიურად საარჩევნო რეჟიმში მოქმედებს, თავისი ქმედებებით კიდევ ერთხელ ახსენებს მოსახლეობას თავის თავს. კოლოსალურ თანხებს ხარჯავს უყაირათოდ, მინდა შევახსენო პრეზიდენტსაც და საზოგადოებასაც, რომ ეს თანხები რომელიც იხარჯება არ განეკუთვნება არც პრეზიდენტს და არც ნაციონალურ მოძრაობას, ეს არის ქართველი ხალხის ფული. რაც შეეხება ბიძინა ივანიშვილს, ჩვენ პარტნიორები ვართ, ერთად გამოვალთ არჩევნებში, ჩვენში მიმდინარეობს პარტიული სტრუქტურების გაძლიერების, ჩვენი ფორმირების, მოწყობის პროცესი. ამას რა თქმა უნდა, თავისი დანახარჯები აქვს. ჩვენ ვიმყოფებით ჩვეულებრივ სამუშაო რეჟიმში, პრეზიდენტი კი აწარმოებს პიარკამპანიას.
_ საზოგადოებისთვის ცნობილია, რომ `რესპუბლიკელები~ და `თავისუფალი დემოკრატები~ ერთად იდგნენ, მაგრამ შემდეგ დაშორიშორდნენ და სასურველ შედეგსაც ვერ მიაღწიეს. ამ ორ პარტიას შორის დაპირისპირება აშკარად შეინიშნებოდა გურიის რეგიონულ ორგანიზაციებში. ამ კუთხით მარინა სუნგულიას (რესპუბლიკური პარტიის ერთ-ერთი ლიდერი, ტიფო მიქატაძის მეუღლე) გამონათქვამებიც ახსოვს საზოგადოებას. როგორ ფიქრობთ, ადგილზე  `რესპუბლიკელები~ და `თავისუფალი დემოკრატები~ `ქართულ ოცნებაში~ ურთიერთობების მყარ საფუძვლებზე დამყარებულ ტანდემს შექმნიან?
ტიფო მიქატაძე: რაშია იცით საქმე? ბოლო პერიოდში საზოგადოება და თავად პოლიტიკური სპექტრი, რომლებიც მოწოდებულები არიან რეალიზაცია გაუკეთონ საზოგადოებრივ პოლიტიკურ მოთხოვნებს, ყოველთვის ძიებაში არიან. ის ალიანსები, თუნდაც ურთიერთკავშირი, კონკრეტული პოლიტიკური სიტუაციიდან გამომდინარე ხდებოდა, ამიტომ იყო მცდელობები ალიანსის, რვიანის, შემდეგ ექვსიანის სახით, რომ შექმნილიყო ხელისუფლების ალტერნატიული პოლიტიკური ცენტრი. ჩვენი საზოგადოების მდგომარეობიდან გამომდინარე თუ არა სერიოზული, ოპოზიციური კონკურენტუნარიანი ძალის არსებობა ქართულ პოლიტიკურ სპექტრში, ძნელად ხდება საზოგადოების ინერტული, პასიური, ამომრჩევლის მოყვანა საარჩევნო უბანში, რომელიც დიდწილად წყვეტს არჩევნების შედეგს. ამიტომ, ჩვენი, `რესპუბლიკელებისა~ და `თავისუფალი დემოკრატების~ კავშირი თავიდან ამ ძიებებიდან იყო გამომდინარე და სამწუხაროა, რომ მაშინ ეს კავშირი ვერ შედგა. ახლა კი, გამოჩნდა სერიოზული ფავორიტი პოლიტიკურ სინამდვილეში და ის არის მაკავშირებელი ამ პოლიტიკური ძალებისა. რაც შეეხება ადგილებზე ჩვენს ურთიერთობას, მე ვადასტურებ, რომ დაულაგებელი ურთიერთობები არსებობს, იმიტომ, რომ არის კითხვები, რაზეც პასუხები ჩვენ ჯერ არ მიგვიღია `თავისუფალი დემოკრატების~ ადგილობრივი ორგანიზაციის მხრიდან და ჩვენი გამოცდილების პოლიტიკური პარტია, რომელსაც ბოლო წლებში ახსოვს ზეწოლების ფასი, ვიცით  ღალატის ფასიც და ვიცით ხელისუფლების არსენალში ბრძოლის მეთოდები, ჩვენი პოლიტიკური პარტნიორებიდან ვითხოვთ, ისევე როგორც ჩვენ მათ ვთავაზობთ, ნდობისა და საიმედობის ძალიან მაღალ ხარისხს.
უნდა ვივარაუდოთ, რომ ურთიერთიობები საბოლოოდ არ არის დალაგებული და ამ ეტაპზე მხოლოდ საერთო ინტერესებიდან გამოდიხართ?
_ჩვენ ვართ ინტერესების დალაგების პროცესში და ველოდებით პასუხებს დაგროვილ კითხვებზე. გაეცემა ამ კითხვებს პასუხი, გავაგრძელებთ ურთიერთობას, არა და, დასრულდება ყველაფერი უპრობლემოდ.
თემურ სალუქვაძე:  ჩვენ ვართ პარტნიორები, ვართ პოლიტიკაში, ამიტომ პოლიტიკას თავისი წესები, კულტურა და ჩარჩოები გააჩნია. ჩვენი ამოცანები გაცილებით მაღალი და ღირებულია, ვიდრე რამე პიროვნული. არ ვფიქრობ, რომ ეს გინდა ჩვენს რეგიონში, გინდა სხვა რეგიონში პრობლემებს ქმნიდეს. ჩვენ ერთი გუნდი ვართ და ყველა ერთად შევასრულებთ იმ საერთო სამუშაოს, რაც დავიწყეთ.
ურთიერთობის საბოლოო ჩამოყალიბებამდე ბატონი ტიფო დაგროვილ პასუხგაუცემელ კითხვებზე საუბრობს, უფრო კონკრეტულად ხომ ვერ გვეტყვით რაზე შეიძლება მიანიშნებდეს?  
_მართალი გითხრათ, ბატონი ტიფო კითხვით ნიშანს რაზე სვამს არ ვიცი, არ ვარ საქმის კურსში. თუ ვინმეს რაიმე კითხვითი ნიშანი აქვს, არ ვიცი, მაგრამ მე პირადად პირველ რიგში საკუთარ თავს ვუსვამ კითხვით ნიშანს და მერე სხვა დანარჩენს. მთავარი დღეს ის არის, რომ ჩვენი ქვეყანა არაორდინალურ სიტუაციაში იმყოფება, კიდევ ერთხელ უნდა გაიაროს ბეწვის ხიდზე. ჩვენ დავპირდით საზოგადოებას, რომ თითოეული მოქალაქის ჩართულობით ამ ხელისუფლებას გავუშვებთ და ავუხდენთ თითოეულ მოქალაქეს ქართულ ოცნებას. ეს იქნება დასაწყისი იმისა, რომ მომავალ წელს ჩვენი საზოგადოება და მოსახლეობა უფრო მოწესრიგებული იქნება გნებავთ სოციალური, ფინანსური თუ დასაქმების კუთხით.
_ რამდენად სწორად მიგაჩნიათ, ასტრონომიული თანხების ხარჯვა კონკრეტულ მედია ორგანიზაციებზე, როცა თავად ივანიშვილს ხშირად გამოუთქვამს პრეტენზია ხელისუფლების მხრიდან მონოპოლიზებული მედიის გამო. არ ფიქრობთ, რომ ახლა უკვე ის მედიასაშუალებები მონოპოლიზებული და წნეხში მოქცეული უკვე თქვენი მხრიდან იქნება. რაც მედიაში არათანაბარ პირობებს და კონკურენტული გარემოს ფაქტიურ კვდომას გამოიწვევს?
ტიფო მიქატაძე: თქვენ საინტერესო სიტყვები ახსენეთ ზემოთ არაადექვატური და შემდეგ ასტრონომიული. თუ შევაფასებთ იმ ციფრებს, რაც გაჟღერებულია და რაც ლეგალური არხებით პოლიტიკურ პარტიებს, საზოგადოებრივ თუ პოლიტიკურ ფიგურებს ჩაერიცხათ და თუ შევადარებთ `ნაციონალური მოძრაობის~, როგორც სახელისუფლებო პარტიის შესაძლებლობებთან, მის რესურსებთან, ანუ სახელისუფლებო რესურსებთან, რომელიც სწორედ საარჩევნოდ იხარჯება და ერთი პარტიის ინტერესებს ხმარდება, ეს არის შენობა-ნაგებობები, მატერიალურ-ტექნიკური ბაზა, საფინანსო-საბიუჯეტო რესურსები და ა.შ. არანაირ ასტრონომიულობასა და არაადაქვატურობაზე საუბარი არ შეიძლება.
თემურ სალუქვაძე: ჩემი მოსაზრება შემიძლია გითხრათ. თქვენ იცით, რომ მთელი სატელევიზიო სივცე ხელისუფლებას დაპყრობილი აქვს. რაიმე ცუდი იმაში, რომ რომელიმე მედია საშუალებას სარეკლამო მომსახურებისთვის გადავუხადოთ გარკვეული თანხა არაფერი არ არის.
_ანუ ეს ნიშნავს რომ მედია არათანაბარ პირობებში მიზნობრივად არის ჩაყენებული,  რაზეც ხელისუფლებას ხშირად მიუთითებდით ხოლმე. ოპოზიციისა და ხელისუფლების ბრძოლის მეთოდები ძალიან ხომ არ დაემსგავსა ერთმანეთს?
ტიფო მიქატაძე: ეს არის საზოგადოებრივი ორგანიზაციის, პოლიტიკური პარტიის თუ პიროვნების არჩევანი, რა შემთხვევაშიც ის ურიცხავს ფულს მედია საშუალებას როგორც მე ვიცი და როგორც გაჟღერდა, სარეკლამო მიზნებისათვის, იმ სარგებლიდან გამომდინარე, რაც მას სჭირდება. ასე რომ, სარეკლამო ხარჯებს თავისი გათვლები აქვს, ამიტომ აქ განსაკუთრებული არაფერი არ ხდება.
თემურ სალუქვაძე: ეს არის რაღაც ერთი მომენტი, რომელიც საზოგადოებისთვის გახდა ცნობილი, ეს ხომ დღევანდელობაა. მე ვერ გეტყვი, რა იქნება ხვალ, რა ჩანაფიქრი აქვს ბატონ ბიძინას. ის გამოცდილი ბიზნესმენია, ძალიან ჭკვიანი პიროვნება. ვფიქრობ, ეს გარკვეული პროცესის ერთი მცირე ნაწილია.
_ანუ ეს ჩვეულებრივი პოლიტიკური პროცესია?
_რა თქმ აუნდა, ისევე როგორც `ნაციონალურ მოძრაობას~ ან სხვა პოლიტიკურ ძალას  შეუძლია ფული ჩადოს, გადაურიცხოს ნებისმიერ მედია საშუალებას ასევე მოხდა კონკრეტულ შემთხვევაში.
_ რაც შეეხება იმ ხვალინდელ დღეს, რაზეც თქვენ ხშირად საუბრობთ და რასაც საბოლოოდ მაინც ამომრჩეველი წყვეტს ხოლმე, როგორ ფიქრობთ, რეალურად დღეს აქვს საზოგადოების უმრავლესობას მოთხოვნები იმაზე, რასაც თქვენ სთავაზობთ? მზადაა, გამოგყვეთ რა მიმართულებითაც მიდიხართ და დარწმუნებული ხართ, რომ ეს სწორად შერჩეული ტაქტიკაა?
ტიფო მიქატაძე: აშკარად ჩანს და ეს დადასტურდა ჩვენს მიერ განხორციელებული კარდაკარის პრინციპის პროცესში, რომ მოსახლეობაში არის იმედიანი მოლოდინები, თუმცა შიშნარევი, ესეც უნდა აღინიშნოს. ივანიშვილის გამოჩენამ ეს იმედები გააცოცხლა, გააღვივა. ახლა ამ ყველაფერს სჭირდება რაციონალური, გონივრული გეგმის შემუშავება. ამაზე მიდის ძალიან სერიოზული მუშაობა `ქართულ ოცნებაში~ კომისიებისა და ქვეკომისიების დონეზე, როგორც ხედვების ჩამოყალიბების მიმართულებით, ასევე პიარტექნოლოგიების კუთხით.
თემურ სალუქვაძე:, ჩვენ რომ არ ვეხმიანებოდეთ ჩვენი საზოგადოების მოთხოვნას, მაშინ არ ვიარსებებდით. ყველა გამოძახილს თავისი რაღაც პროდუქტი ახლავს. ჩვენ ვეხმიანებით იმ გამოწვევებს, რაც აწუხებს დღეს ჩვენს საზოგადოებას. პირველი რა არის _ მიტოვებული სოფლის მეურნეობა, დაუსაქმებელი ადამიანები, სოციალურად დაუცველი საზოგადოება, განათლების სისტემაში არსებული პრობლემები, ჩვენ გვაქვს კონკრეტული პროგრამები, რომლის შედეგადაც თითოეული მოქალაქე მიიღებს კეთილდღეობას. ჩვენ, ჩვენი პოლიტიკური პროცესების შედეგად საქართველოში მივიღებთ თავისუფალ ადამიანს, ესაა ჩვენი მთავარი მიზანი.
_საკანონმდებლო ჩარჩოებში რამდენად ჯდება წინასაარჩევნო პერიოდამდე საარჩევნო პიარკამპანიის ასეთი მასშტაბებით, აქტივობებით წარმოება?
ტიფო მიქატაძე: არის ასეთი ფრთიანი გამოთქმა, არჩევნები მთავრდება, არჩევნები იწყება. თუმცა, არსებობს განსაზღვრული ვადებიც, წინასაარჩევნოს რომ ეძახიან.
-პოლიტიკური პარტიები, რომლებიც გამოცოცხლდებიან, გამოფხიზლდებიან ობიექტური თუ სუბიექტური მიზეზების გამო, მხოლოდ იმ ორთვიან გამოცხადებულ საკანონმდებლო ვადებში. ბუნებრივია, ისინი სუფთად არ უდგებიან ხოლმე არჩევნების დღეს. ანუ ის ფაქტი, რომ როგორც ხელისუფლებამ, ასევე ოპოზიციამ ადრე დაიწყო ამაზე ფიქრი, ეს ძალიან კარგია. გაიზრდება საზოგადოებრივი ჩართულობა, ფიქრისთვის მეტი დრო ექნება, მეტი ინფორმაცია. ეს ნორმალურია და დაკავშირებულია იმ მნიშვნელობასთან, რა მნიშვნელობასაც ეს არჩევნები ატარებს.