უამრავი ტურისტი, რომელიც ქალაქში ჩამოდის და, ვთქვათ, თეთრ ხიდზე გადამდგარი, თეთრი ქვების სილამაზით ტკბება, იქვე თვეობით დაგროვილ ნაგავსაც მოავლებს თვალს... დაუდევრად ექცევიან გარემოს თავად ის მეწარმეებიც, რომელთაც სანაპიროზე რესტორნები აქვთ გახსნილი. მაგალითისათვის ავიღოთ თუნდაც ჯაჭვის ხიდთან აგებული რესტორანი „ჯაჭვის ხიდი", რომლის სამზარეულო უშუალოდ რიონის სანაპიროს გადმოჰყურებს. სამზარეულოს ნიჟარაში ქიმიური სარეცხი საშუალებებით გარეცხილი ჭურჭლის წყალი პირდაპირ მდინარეში ჩაედინება. არადა, გაფილტვრის შემდეგ ხომ ამ წყალს ქუთაისისა და მისი შემოგარენის მოსახლეობის უმეტესობა სვამს! საინტერესოა, რას ფიქრობენ თემასთან დაკავშირებით გარემოს დაცვის კუთხით მომუშავე პირები და როგორ შეაფასებენ ისინი მდინარე რიონის სანაპიროზე არსებულ ნაგავსაყრელს.
„ცელოფანი და პოლიეთილენის ბოთლები რომ ბუნების მტერია, ეს მსოფლიომ რამდენიმე წელია გააცნობიერა. უნდა ითქვას, რომ ქუთაისში დასუფთავების სამსახურის მუშაობა ბოლო წლებში საგრძნობლად გაუმჯობესდა, თუმცა ახლა საქმე გვაქვს მოსახლეობის დაუდევრობასთან. ხშირად, როცა ხიდზე გადავდივარ, შემიხედავს, თუ როგორ აგდებენ, პოლიეთილენის ბოთლს, სიგარეტის კოლოფებს მდინარე რიონში, როცა იქვე, რამდენიმე მეტრში, ურნა დგას. არადა, მოგეხსენებათ, პოლიეთილენს საუკუნეები სჭირდება, რომ გაიხრწნას. მდინარეში ჩაყრილი ცელოფნებით, რა თქმა უნდა, დაიღუპებიან თევზები და წყლის სხვა ბინადრები," - გვითხრა საქართველოს მწვანეთა ორგანიზაციის ქუთაისის კოორდინატორმა თეიმურაზ კეპულაძემ.
რატომ არ ინტერესდება აღნიშნული „ნაგავსაყრელებით" დასუფთავების სამსახური და იგეგმება თუ არა მდინარის ნაპირების გაწმენდა, ამ შეკითხვით დასუფთავების სამსახურის უფროსს, ფრიდონ ბეშკენაძეს მივმართეთ.
„ჩვენს სამსახურს არ ევალება, მდინარე რიონის სანაპიროზე მდებარე სკვერების გაწმენდა, მასზე მოვლასა და პატრონობაზე გამოცხადებული იყო ტენდერი, რომელშიც გაიმარჯვა ქეთინო შენგელიამ და მას მიმართეთ," - გვითხრა ბატონმა ფრიდონ ბეშკენაძემ.
სამწუხაროდ, ჩვენთვის შეუძლებელი გახდა ამ პიროვნებასთან - ქეთინო შენგელიასთან დაკავშირება, რადგან მასზე დასუფთავების სამსახურს არანაირი ინფორმაცია, ან საკონტაქტო ტელეფონის ნომერი არ აქვს. მდინარე რიონის სანაპიროს კი უახლოეს მომავალში, როგორც ვხვდებით, დასუფთავება არ შეეხება.
მივმართავთ ქუთაისის ხელმძღვანელობას, მოსახლეობას - თუ უცხოელებისათვის ისტორიული ქალაქის იერსახის ჩვენება, ტრადიციული ფასეულობების გაცნობა გვინდა, რიონის სანაპიროს უნდა მივხედოთ!
ადრე ნებისმიერი დიასახლისი კარმიდამოს დასუფთავებას ჭიშკრიდან და კოინდრიდან იწყებდა... ქუთაისის „ჭიშკარი" და მისი მთავარი სავიზიტო ბარათი კი სწორედ რიონი, თეთრი ქვები და ისტორიული ხიდებია, ის წარმტაცი ხედია, რომელსაც, დაუდევარი ადამიანების წყალობით, ასე ვაუშნოებთ.