15 ბრძოლა და არცერთი მარცხი _ ეს რუსთაველი სპორტსმენების შალვა მამაცაშვილისა და ლევან კირთაძის გასული წლის შედეგია.

    ახალგაზრდა წარმატებული მებრძოლების გამარჯვებების სერია კვლავ გრძელდება. მათ 2011 წელსაც არაერთ ტურნირში მიიღეს მონაწილეობა და პრიზებთა მრავალფეროვან კოლექციას კიდევ რამდენიმე თასიც შემატეს.

  თავისუფალ ორთაბრძოლებში მოასპარეზე შალვა მამაცაშვილი საქართველოს საბრძოლო ხელოვნებათა კონფედერაციამ გასული წლის საუკეთესო მებრძოლადაც დაასახელა, ხოლო ლევანს კი ეს ტიტული კლუბმა ”მეომარმა” მიანიჭა.

    ცერემონია სასტუმრო “ამბასადორში” გაიმართა, რომელსაც სახელმწიფო მინისტრი გიორგი ბარამიძე, პარლამენტის ვიცე-სპიკერი მიხეილ მაჭავარიანი და პარლამენტის სპორტისა და ახალგაზრდული კომიტეტის თავმჯდომარე გიორგი ასანიძე ესწრებოდნენ.

   შეგირდების ასპარეზობით კმაყოფილია მწვრთნელი ბესიკ ასლამაზიშვილიც. როგორც მან ჩვენთან საუბრისას აღნიშნა, ამ შედეგით არ დაკმაყოფილდებიან და 2012წელსაც უმაღლესი მიზნებისთვის გააგრძელებენ ბრძოლას.

  შალვა მამაცაშვილი: 

  _ გასულ წელს ეროვნულ პირველობაზე, თბილისის ღია ჩემპიონატზე, პროფესიონალურ ორთაბრძოლებში ჩატარებულ ტურნირებში მივიღე მონაწილეობა და საბედნიეროდ ყველგან საუკეთესო შედეგი ვაჩვენე. რის შედეგადაც კონფედერაციამ საუკეთესო მებრძოლად დამასახელა. ვეცდები, ეს ტიტული მომავალ წლებშიც შევინარჩუნო.

   ლევან კირთაძე:

_ მოხარული ვარ, რომ კლუბმა საუკეთესო სპორტსმენად დამასახელა, რისთვისაც მის ხელმძღვანელობას დიდ მადლობას ვუხდი. ვფიქრობ, მათ იმედებს გავამართლებ და 2012 წელი ჩემთვის უფრო წარმატებული იქნება. შეგახსენებთ, რომ შალვა და ლევანი რამდენიმე თვეში ხორვატიაში გასამართ მსოფლიო ჩემპიონატზეც გეგმავენ ასპარეზობას.