გურია

ოზურგეთი-ნატანების საავტომობილო გზის მე-14 კილომეტრზე, მდინარე ჭახვათაზე არსებული ხიდი ავარიულ მდგომარეობაში იყო. საავტომობილო გზების დეპარტამენტის მიერ გამოცხადებულ ტენდერში სამშენებლო კომპანიამ სააქციო საზოგადოება ”ხიდმშენმა” (ხელმძღვანელი ჯიმი მამალაძე) გაიმარჯვა. ახალი ხიდის ასაგებად სახელმწიფო ბიუჯეტმა 651 ლარი გამოყო. აიგო 43 მეტრი სიგრძის სამმალიანი ხიდი, რომლის სავალი ნაწილის სიგანე 7 მეტრია. ახალაშენებულ საავტომობილო ხიდზე მოეწყო ახალი ბურჯები, ტროტუარები და მოაჯირები. ხიდის სავალ ნაწილზე დაიგო ასფალტ-ბეტონის საფარი, მოეწყო საგზაო ნიშნები და შესრულდა სავფალი ნაწილის მონიშვნის სამუშაოები. მისასვლელთან დამონტაჟდა თვალამრიდი ძელები. აღნიშნული ხიდი შეუფერხებლად გაატარებს ყველა სახის ავტოტრანსპორტს.

12 იანვარს ახალი ხიდის საზეიმო გახსნას საგზაო დეპარტამენტის თავმჯდომარე რამაზ ნიკოლაიშვილი და გურიის გუბერნატორი ვალერი ჩიტაიშვილი დაესწრენ.

- ჩვენ ყველაზე მაგრები ვართ ხიდების მშენებლობაში. ჩოხატაური უკვე ”გადავაშავეთ” (იგულისხმა ახალი ასფალტის დაგება) ახლა ოზურგეთის ჯერია. გაზაფხულიდან ოზურგეთში ახალი მშენებლობები გაჩაღდება. მარტში დავიწყებთ ოზურგეთი-ჯუმათი-ლანჩხუთის 25 კილომეტრიანი ბეტონის საფარით გზის დაგებას, სადაც 22 სოფელია. გაგრძელდება ოზურგეთი –შემოქმედი-გომისმთის გზის მშენებლობა - თქვა რამაზ ნიკოლაიშვილმა.

ჩვენთვის კვლავ გაუგებარი დარჩა, რატომ უცვლიან თბილისელი გზის მშენებლები ჩვენს მდინარეებს სახელებს. შარშან გაზაფხულზე მდინარე ბჟუჟი (უფრო სწორი ფორმა ”ბჟუჯია”) ”ბჟუჟა” დაარქვეს. ახლა მდინარე ”ჭახვათა” ”ჯახვათათ” მონათლეს.