გუშინ ქ. ოზურგეთში არაოფიციალური ვიზიტით საქართველოს შსს მინისტრი ვანო მერაბიშვილი იმყოფებოდა. როგორც ამბობენ, ბოლო პერიოდში ეს მესამე ვიზიტი იყო გურიაში. ვანო მერაბიშვილთან ერთად ოზურგეთში იყვნენ შსს მინისტრის მოადგილე ეკა ზღულაძე და ოპერატიური სამსახურების ხელმძღვანელები. მოგვიანებით მათ საქართველოს რეგიონალური მართვის მინისტრი დავით ტყეშელაშვილი შეუერთდა. ვანო მერაბიშვილი გურიის შსს მთავარი სამმართველოს შენობაში სამმართველოს უფროსთან შოთა ჭანუყვაძესთან განმარტოვდა. რამდენიმე წუთში გამოვიდა შენობიდან და თანმხლებ პირებთან, შსს თანამშრომლებთან ერთად გაემგზავრნენ. მათ ამალაში იყვნენ გურიის გუბერნატორი ვალერი ჩიტაიშვილი, მხარის პროკურორი ილია ჯალაღანია, კონსტიტუციური უსაფრთხოების სამსახურის თანამშრომლები.

გაზეთ "ალიონისა" და "გურია ნიუსის" ჟურნალისტების მცდელობას, მიეღოთ რაიმე სახის ინფორმაცია მინისტრის სტუმრობის შესახებ, შედეგი არ მოჰყოლია, სურათის გადაღებაც კი აგვიკრძალეს.

შევეცადეთ გურიის ვიცე-გუბერნატორის ლელა თავართქილაძის საშუალებით (იგი მერაბიშვილის ექსკორტს გაჰყვა კახა ასკურავასთან ერთად) გაგვეგო მინისტრის ჩამოსვლის მიზანი, მაგრამ მან ჩვენს სატელეფონო ზარს არ უპასუხა.