სპექტრი. 19 მაისს დედოფლისწყაროს საგანმანათლებლო რესურსცენტრის შენობაში ამავე ორგანიზაციის ინიციატივით ჩატარდა რაიონული ტურნირი ჭადრაკში. პაექრობა გაიმართა როგორც მოსწავლეთა, ასევე მასწავლებელთა შორისაც. ტურნირში მონაწილეობას იღებდა 12 გუნდი. დედოფლისწყაროს #1 და #2 საჯარო სკოლები, სოფლების წითელწყაროს, ოზაანის, გამარჯვების, სამთაწყაროს, ფიროსმანის, საბათლოს, ზემო ქედის #1 და #2 საჯარო სკოლები. ხანგრძლივი და დაძაბული თამაშის შემდეგ გამარჯვებულები გამოვლინდნენ. მოსწავლეთა შორის გუნდური I ადგილი დაიკავა დედოფლისწყაროს #1-მა საჯარო სკოლამ, II ადგილის მფლობელი გახდა ფიროსმანის საჯარო სკოლა, ხოლო III ადგილზე გავიდა საბათლოს საჯარო სკოლა. მასწავლებელთა შორის გუნდური I ადგილის მფლობელი გახდა გამარჯვების საჯარო სკოლა, II და III ადგილები კი შესაბამისად, სამთაწყაროსა და ფიროსმანის საჯარო სკოლებმა გაინაწილეს. მოსწავლე ვაჟთა შორის ინდივიდუალურ შეჯიბრში წარმატებას მიაღწიეს სოფელ გამარჯვების XI კლასის მოსწავლემ დავით თარაშვილმა (I ადგილი), ამავე სკოლის X კლასის მოსწავლემ თორნიკე არაბულმა (II ადგილი) და ჯაფარიძის IX კლასის მოსწავლემ გიგა ყოჩიაშვილმა (IIIადგილი). გოგონათა შორის გამარჯვებული გახდა წითელწყაროს X კლასის მოსწავლე ვენერა გოზალიშვილი, II ადგილი დაიკავა სამთაწყაროს საჯარო სკოლის IX კლასის მოსწავლემ მარიამ ჩოხელმა, ხოლო III ადგილს დასჯერდა ზემო ქედის I საჯარო სკოლის მოსწავლე ეთერ ბუჩუკური. პედაგოგ ქალთა შორის I, II და III ადგილები გაინაწილეს შესაბამისად: დარეჯან პოპიაშვილი-ჩოხელმა (სამთაწყაროს საჯარო სკოლა), თამარ ბატიაშვილმა და მაია პოპიაშვილმა (გამარჯვების საჯარო სკოლა).