საკვებ პროდუქტებსა და პირველადი მოხმარების საგნებზე ფასების ზრდა მოსახლეობას მძიმე ტვირთად დააწვა. ამას ემატება კომუნალური გადასახადების სავარაუდო ზრდა და მოსალოდნელი მკაცრი ზამთრის შიში, ამის გამო დედოფლისწყაროს (და არა მარტო დედოფლისწყაროს) მოსახლეობა პანიკამ მოიცვა."არ გვინდა რეალობას თვალი გავუსწოროთ, მაგრამ ფაქტია, ასეთი გაჭირვება რაც ახლო მომავალში გველოდება, ალბათ არასდროს ყოფილა. არც მეტი, არც ნაკლები, 90-იან წლებს ვუბრუნდებით, ერთი განსხვავებით, მაშინ პური არ იყო და ძლივს ვშოულობდით, ახლა არის, მაგრამ ისეთი ძვირია, გაბედულად ვერ გვიჭამია. ამბობენ, სექტემბერში პურის ფასმა კვლავ უნდა მოიმატოს და გაორმაგდესო, თუ მართლაც ასე მოხდა, სიღატაკეში ამოგვხდება სული. იქამდე მივალთ, რომ მართლაც უკიდურესად მდიდრებით და უკიდურესად ღარიბებით აივსება ეს ქვეყანა," _ ამბობენ მოქალაქეები და იქვე გაზის, წყლის და დენის შესაძლო გაძვირების შესახებაც საუბრობენ. "თუ კომუნალური გადასახადებიც გაძვირდა, მაშინ რა გვეშველება არ ვიცი. ჯერ ისედაც შემოსავლის დიდი ნაწილი გადასახადებში მიდის და გაძვირების შემთხვევაში უფრო რთულ მდგომარეობაში აღმოვჩნდებით," _ ამბობს ალექსანდრე ბადურაშვილი. ტარიფების გაძვირების შესახებ ინფორმაციას არ ადასტურებს კახეთის ენერგოდისტრიბუციის დედოფლისწყაროს მომსახურების ცენტრის უფროსი ვლადიმერ მოსულიშვილი.

იგივე მოსაზრებას აფიქსირებს "დედოფლისწყარო რაიგაზის" დირექტორი ბატონი ემზარ ჯანაშვილი და შპს საქართველოს გაერთიანებული წყალმომარაგების კომპანიის დედოფლისწყაროს სერვისცენტრის მენეჯერი გიორგი ბენაშვილი.

მართალია, კომუნალური გადასახადების გაზრდის შესახებ ინფორმაცია არც ერთმა უწყებამ არ დაადასტურა, მაგრამ მოსახლეობა მაინც შეშფოთებულია და მოახლოებულ ზამთარს შიშით ელოდება.