სპექტრი. გასულ თვეს, საქართველოს განათლებისა და მეცნიერების მინისტრმა, დიმიტრი შაშკინმა, სასწავლო წელთან დაკავშირებულ სიახლეებზე ბრიფინგი გამართა და სასწავლო წლის ხანგრძლივობასა და ვადებზე ისაუბრა. უკვე ცნობილია, რომ ამიერიდან ყოველ წელს სწავლა 15 სექტემბერს დაიწყება და 15 ივნისს დასრულდება.

სასწავლო წელთან დკავშირებულ სიახლეებზე `სპექტრი~ საქართველოს განათლებისა და მეცნიერების სამინისტროს გურჯაანის საგანმანათლებლო რესურსცენტრის უფროსს, ლალი გაბიტაშვილს ესაუბრა. "2010-2011 სასწავლო წელი 15 სექტემბრიდან 15 ივნისამდე გაგრძელდება ეს თარიღი ამიერიდან აღარ შეიცვლება. მხოლოდ I და XII კლასი დაამთავრებს 20 მაისს. ასევე იქნება ფიქსირებული არდადეგები. საშობაოდ სკოლა 24 დეკემბრიდან 20 იანვრამდე დაისვენებს. რაც შეეხება მცოცავ არდადეგებს, ეს იქნება სააღდგომოდ დიდი ხუთშაბათიდან, მომდევნო კვირის ოთხშაბათამდე. გარდა ამ სიახლეებისა, მოიხსნება ტრიმესტრი და წლის განმავლობაში ორი სემესტრი იქნება," _ აღნიშნავს ლალი გაბიტაშვილი.

 

პრეზიდენტის მითითებით, სკოლებში სავალდებო გახდება ცეკვის გაკვეთილების დამატება, თუმცა, როგორც გურჯაანის საგანმანათლებლო რესურსცენტრის უფროსი აღნიშნავს, წელს გურჯაანის მუნიციპალიტეტის სკოლებში ამ საგნის დამატება არ მოხდება, რადგან ჯერჯერობით უცნობია საბოლოოდ როგორ ჩამოყალიბდება ეს ინიციატივა. მიმდინარე სასწავლო წელს არ მოხდება ასევე პირველკლასელთა კომპიუტერიზაცია. ეს პროექტიც ჯერ მხოლოდ, ბათუმის, ქუთაისის, ზუგდიდისა და თბილისის ზოგიერთ სკოლაზეა გათვლილი. სიახლეა ასევე სახელმძღვანელოების გაცემასთან დაკავშირებითაც. "აქამდე წიგნს ყველა პირველკლასელი უფასოდ იღებდა. ახლა მხოლოდ სოციალურად დაუცველ მოსწავლეებს (ვის ოჯახსაც 57 ათასი ქულა აქვს) დაურიგდებათ I-დან XII კლასის ჩათვლით. წლის ბოლოს კი სახელმძღვანელოები ბიბლიოთეკას ჩაბარდება და შეიქმნება ფონდი, რომელიც შემდგომ უკვე სხვა ბავშვებისათვის იქნება ხელმისაწვდომი," _ განმარტავს ლალი გაბიტაშვილი.

რაც შეეხება ინგლისური ენის პედაგოგებს, რესურსცენტრის უფროსის თქმით, საქართველოში ჩამოსული ახალი ნაკადიდან გურჯაანის მუნიციპალიტეტში ჯერჯერობით არც ერთი პედაგოგი არ გამოუგზავნიათ, თუმცა სკოლების თითქმის 80%-ს ამის თაობაზე განაცხადი უკვე გაკეთებული აქვს.