კახეთი

სპექტრი. გასულ კვირას, ჭიაურის სამონადირეო მეურნეობა შპს `ფაუნამ~ `სპექტრის~ რედაქციას აცნობა, რომ ლაგოდეხის მუნიციპალიტეტში, ბრაკონიერობის კიდევ ერთი შემთხვევა მოხდა. მდინარე ალაზნის ხიდთან ხუთი მოქალაქე, უკანონოდ ნადირობდა. შპს `ფაუნას~ დაცვის უფროსი ზურაბ გოგოლაძე განმარტავს, რომ აღნიშნული ფაქტი 19 ნოემბერს დააფიქსირეს. "დილის საათებში მორიგი შემოვლის დროს დაკვირვებას ვაწარმოებდით. იქ, სადაც ნადირობის ამკრძალავი ტრაფარეტებია, მანქანა შევამჩნიეთ. ახლოს მივედით და დავინახეთ, რომ ხუთი მოქალაქე ნადირობდა. რა თქმა უნდა, მაშინვე პოლიცია გამოვიძახეთ, რომლებმაც ის ადამიანები ადგილზე დააკავეს," _ გვითხრა ზურაბ გოგოლაძემ.

მისივე თქმით, მოქალაქეები, რომლებიც უკანონოდ ნადირობდნენ, ძირითადად თბილისიდან იყვნენ. "გამოძიება უკვე დაიწყო. რა თქმა უნდა, მოხდა მათი იდენტიფიცირება. ესენი არიან: ზაზა ხუხაშვილი, გიორგი არმაზანაშვილი, მალხაზ ამურველაშვილი, მურმან გაგნიძე და ზურაბ ხუკაშვილი," _ აღნიშნა შპს `ფაუნას~ დაცვის უფროსმა. შეგახსენებთ, რომ ოქტომბერში შპს ,,ფაუნას‘‘ ტერიტორიაზე 4 ბრაკონიერი დააკავეს, რომლებიც ე.წ. დენის აპარატით თევზაობდნენ. ბრაკონიერობა სისხლის სამართლის დანაშაულია და ჯარიმით ან თავისუფლების აღკვეთით ისჯება.