საკრებულოს სოციალურ საკითხთა კომისიის ინიციატივითა და ქალაქის თვითმმართველობის თანადგომით მსახიობ ბადრი კაკაბაძის დაბადების 55 და შემოქმედებითი მოღვაწეობის 35 წლის იუბილე აღინიშნა.

 მსახიობი 1975 წლიდან მოღვაწეობს რუსთავის დრამატულ თეატრში.

 იუბილეს ესწრებოდნენ მსახიობები, ბატონი ბადრის მეგობრები და კოლეგები: მსახიობები ნუკრი არჩვაძე, ნათელა მუხულიშვილი, რეჟისორი გოჩა კაპანაძე, რუსთავის დრამატული თეატრის დირექტორი ლალი თაბაგარი და სხვები.

 მსახიობი საპატიო სიგელითა და მაცხოვრის ხატით დაჯილდოვდა, რომელიც რუსთავის მერმა მამუკა ჩიქოვანმა გადასცა.

 მამუკა ჩიქოვანი, რუსთავის მერი:

 - მადლობა მინდა გადავუხადო ბადრი კაკაბაძეს, იმისთვის, რომ შემოქმედებითი ცხოვრების მნიშვნელოვანი ნაწილი რუსთავის თეატრს შეალია. ქალაქის მერია განსაკუთრებულ ყურადღებას უთმობს უდიდესი ტრადიციების მქონე რუსთავის თეატრის განვითარებას. უკვე დაწყებულია სარემონტო სამუშაოები და სულ მალე თეატრი ისეთი გახდება, როგორსაც იმსახურებს ჩვენი ქალაქი. რუსთაველების სახელით კიდევ ერთხელ ვუხდი მადლობას ბადრი კაკაბაძეს და ვუსურვებ შემოქმედებით წარმატებას... საყვარელ მსახიობს ყველა დიდი სიყვარულით ულოცავდა იუბილეს.

 ნათელა მუხულიშვილი, მსახიობი:

 - ეს არის ბედნიერი შემთხვევა, როდესაც ქალაქის ხელმძღვანელობა პატივს სცემს თეატრს, მის უნიჭიერს და წამყვან მსახიობს ბადრი კაკაბაძეს, რომელიც არა მარტო რუსთავის თეატრის, არამედ სრულიად საქართველოს კულტურის სიამაყეა, მთელი საქართველოს საყვარელი მსახიობია.

 გოჩა კაპანაძე, რეჟისორი:

 – ბადრის პირველ რიგში ვუსურვებ ჯანმრთელობას, ბევრ კარგ როლს. ის ამ მხრივ განებივრებულია. მაგრამ მსახიობი არასდროს არ არის კმაყოფილი და ყოველთვის უფრო მეტი უნდა. ბადრის აუცილებლად ექნება ბევრი როლი. ბადრისნაირი მსახიობი ცოტაა, არა მარტო რუსთავში, არამედ მთლიანად ქართულ თეატრში. ბადრი საინტერესო მსახიობია და ჩემთვის საპატიოა მასთან მუშაობა.

 ბადრი კაკაბაძე:

 – ჩემთვის ძალიან მნიშვნელოვანია ასეთი ყურადღება, სასიამოვნოა, როცა გეფერებიან, ყურადღებას გაგცევენ. ასეთი მომენტები აახალგაზრდავებს ადამიანს, მადლობის მეტი არაფერი მეთქმის. მხატვარმა ალექსანდრე თოდუამ ბადრი კაკაბაძეს საკუთარი ნახატი უსახსოვრა.