რუსთავის პროფესიული სწავლების ცენტრ "იმედში” 5 მარტს ღია კარის დღე მოეწყო, რომელიც ქალთა დღესასწაულს მიეძღვნა. სპეციალურად ამ დღისთვის სასწავლებლის მუზეუმში სტუდენტების მიერ შექმნილი ხალხური რეწვის ნიმუშები გამოიფინა.

 ცენტრის სტუმრებს ერთმანეთის გვერდით შეეძლოთ კერამიკის, ტიხრული მინანქრის და თექის ულამაზესი ნამუშევრების დათვალიერება. სასწავლებლის საააქტო დარბაზის სცენაზე კი სტუდენტებმა თვითშემოქმედებითი კონცერტიც გამართეს, სადაც წარმოდგენილი იყო როგორც საესტრადო, ასევე ქორეოგრაფიული ნომრები...

 დავით ჯალაღანია (რუსთავის პროფესიული სწავლების ცენტრ `იმედის” დირექტორი):

 _ ჩვენს სასწავლებელში სხვა მრავალ დარგთან ერათად ხალხური რეწვის ხელობაც ისწავლება. ეს გამოფენა სწორედ ინდიკატორია იმისა, თუ როგორ შეძლეს სტუდენტებმა ახალი პროფესიის დაუფლება. მინდა ვისარგებლო შემთხვევით და რუსთაველ მანდილოსნებს ქალთა დღესასწაული მივულოცო. ვუსურვებ, რომ მათი ცხოვრება მუდამ ბედნიერებით და ლამაზი დღეებით სავსე იყოს.

 რამაზ კაციტაძე (ცენტრ `იმედის” კერამიკის ინსტრუქტორი):

 _ დღეს ჩემი მოსწავლეების ნამუშევრებიც არის გამოფენილი. მათ ბევრი იშრომეს და საკმაოდ კარგ შედეგსაც მიაღწიეს. ქართველ ქალბატონებს კი ვულოცავ 8 მარტს და ბედნიერებას ვუსურვებ.

 მაკა გარსევანიშვილი (ცენტრ `იმედის” სტუდენტი):

 _ ძალიან მიყვარს ხელოვნება და სწორედ ამიტომ გადავწყვიტე ამ პროფესიას დავეუფლო. 5 თვეა რაც ვსწავლობ და დღეს უკვე გამოფენაზე ჩემი რამდენიმე ნამუშევარიც არის წარმოდგენილი. ვფიქრობ, მომავალშიც გავაგრძელებ თექაზე მუშაობას და სხვადასხვა სახის ნივთების შექმნას...