დავით ყიფიანის თასის გათამაშებაში საჩხერის “ჩიხურას” მოპოვებული გამარჯვების შემდეგ, “მეტალურგმა” მეოთხედფინალის საგზური მოიპოვა, სადაც კენჭისყრის შედეგად დაპირისპირება “ვიტ ჯორჯიასთან” მოუწია.

 ამ ორ მეტოქეს შორის პირველი მატჩი გასულ კვირას “ფოლადის” სტადიონზე გაიმართა. სუსხიანი ამინდის გამო, შეხვედრას გულშემატკივართა მხოლოდ მცირე ნაწილი დაესწრო.თამაში მასპინძელთა უპირატესობით დაიწყო.

  პირველი სახიფათო მომენტი გიორგი მიქაბერიძემ შექმნა, თუმცა დარტყმა არაზუსტი აღმოჩნდა. რამდენიმე წუთში კი კობა ჟორჟიკაშვილის შეგირდებამ გოლის გატანაც შეძლეს. ლაშა ჯაფარიძის პასი სეთურიძემ გამოიყენა. “მეტალურგის” მარჯვენაფლანგელმა ბურთი მეტოქის კარში მოათავსა და რუსთაველები დააწინაურა.

   შესვენების შემდეგ თამაშის ტემპი შედარებით დაეცა. ფეხბურთელებს კომბინაციური თამაში ვერ გამოსდიოდათ და რეალური საგოლე მომენტებიც არ შექმნილა. ირაკლი მოდებაძემ რამდენჯერმე კი შეუტია “ვიტ ჯორჯიას” კარს, მაგრამ ანგარიში აღარ შეცვლილა და საბოლოოდ მასპინძლებმაც 1:0 იმარჯვეს.

 მეოთხედფინალური ეტაპის განმეორებითი შეხვედრა კი მცხეთაში გაიმართება და “მეტალურგი” ამჯერად უკვე სტუმრის სტატუსით ითამაშებს.

  ხოლო რაც შეეხება ეროვნული პირველობას, 15 ტურის შეხვედრები, რომელიც 27ნოემბერს უნდა ჩატარებულიყო თოვლის სახით მოსული ნალექის გამო დროებით გადაიდო. შეგახსენებთ, რომ კობა ჟორჟიკაშვილის შეგირდები ”სპარტაკთნ” მატჩისთვის ემზადებოდნენ.