 თურქეთის ქალაქ ბურსას ათათურქის სახელობის სპორტულ კომპლექსში დასრულდა ევროპის საკლუბო შეჯიბრება თავისუფალ ჭიდაობაში. ევროპის ჭიდაობის ფედერაციის ეგიდით ჩატარებულ ამ შეჯიბრებაზე ბებერი კონტინენტის საუკეთესო საჭიდაო ქვეყანათა რვა გუნდმა მიიღო მონაწილეობა. აქვე იასპარეზა ქართულმა კლუბმა `თბილისი 2007~ -მა, რომელმაც ფინალში გააღწია და მეორე ადგილის დაკავება შესძლო. ქართული კლუბი ძირითადად ახალგაზრდა ფალავნებით იყო დაკომპლექტებული. შემადგენლობაში ორი გორელი მოჭიდავე ლადო ხინჩეგაშვილი (55 კგ) და მალხაზ მუზიაშვილი (74 კგ) ირიცხებოდა. მათ გარდა თურქეთში მოასპარეზე ჩვენი ქვეყნის ნაკრების ღირსებას იცავდნენ მალხაზ ქურდიანი (60 კგ), გოგა ხუჭუა (66 კგ), დავით მარსაგიშვილი (84 კგ), ბელდუხ გავაშელიშვილი (96 კგ) და გიორგი საკანდელიძე (120 კგ).
ჯგუფში, რომელშიც საქართველოს ნაკრები კენჭისყრით მოხვდა, ჩვენების გარდა აზერბაიჯანისა და ბელორუსის გუნდებიც ასპარეზობდნენ. ქართველმა სპორტსმენებმა ორივე მოწინააღმდეგე ერთნაირი ანგარიშით 4:3 დაამარცხეს და ნახევარფინალში გავიდნენ. იქ მათი მეტოქე რუმინეთის საჭიდაო კლუბი იყო, რომელსაც `თბილისი 2007~ -მა დიდი უპირატესობით 6:1 მოუგო, ანუ შვიდი შეხვედრიდან მხოლოდ ერთში დამარცხდა. ფინალი ქართველებსა და მასპინძლების საჭიდაო კლუბ `მეტროპოლიტან-ბელედიესფორს~ შორის ამ უკანასკნელთა გამარჯვებით 5:2 დასრულდა.
ეს ქართველი თავისუფალი სტილის მოჭიდავეებისათვის მიმდინარე წლის ბოლო შეჯიბრება იყო. უახლოესი ტურნირი `თავისუფალთათვის~ იანვარში გასამართი საქართველოს ჩემპიონატია.
დაჩი ნაპირელი
03.12.2009 |
