შენახვა


გადაგზავნა

დაკომენტარება

კალაძე ვაშინგტონში ვიზიტზე: ეს იქნება სწორი და რეალური ინფორმაციის მიწოდება

პოლიტიკა
წყარო:  გურიის მოამბე / http://guriismoambe.com/ 
სტატიაში გამოქვეყნებულ მასალაზე პასუხისმგებელია ავტორი გამოცემა
ინფორმაციის გავრცელებას უზრუნველყოფს სააგენტო REGIONS.GE
 03 თებერვალი 2020

"ეს იქნება სწორი და რეალური ინფორმაციის მიწოდება" - ამბობს ქართული ოცნების გენერალური მდივანი, თბილისის მერი კახა კალაძე ვაშინგტონში ქართული ოცნების დაგეგმილ ვიზიტზე. 

კალაძის თქმით, ქართული ოცნების წარმომადგენლების სათქმელი ძალიან ბევრია. 

"[შეეხება] იმ არასწორ და უზუსტო ინფორმაციებს, რასაც ჩვენ ვნახულობდით წერილებში, რომლებიც ქვეყნდებოდა. შესაბამისად, კონგრესმენებთან, სენატორებთან, ეს კომუნიკაცია, ურთიერთობა, მიწოდება დამატებითი ინფორმაციის, რომ არ იყოს ცალმხრივი ინფორმაცია, არის ძალიან მნიშვნელოვანი,"- ამბობს კახა კალაძე. 

ვაშინგტონში ქართული ოცნების დელეგაციის ვიზიტი მას შემდეგ დაიგეგმა, რაც მთავრობის მეთაურმა აშშ-ის კონგრესისა და სენატის წარმომადგენლების მხრიდან არაერთი კრიტიკული წერილი მიიღეს. 

პროპორციულ საარჩევნო სისტემაზე გადასვლის ჩაგდების შემდეგ პირველი წერილი გიორგი გახარიამ კონგრესში საქართველოს მეგობართა ჯგუფის ხელმძღვანელების, ადამ კინზინგერისა და ჯერი კონოლისგან, მიიღო. წერილში კონგრესმენები იმედს გამოთქვამდნენ, რომ ხელისუფლება დაუყონებლივ მიიღებდა პროპორციულ საარჩევნო სისტემას. ისინი წერდნენ, რომ ქართველებს სურთ მთავრობა, რომელიც უფრო მჭიდრო კავშირში იქნება დასავლეთთან და რომ საქართველოდან გავრცელებული ახალი ამბები, მთავრობის მიერ სანქცირებული ძალადობის შედეგად დემონსტრანტების, პოლიტიკოსებისა და ჟურნალისტების დაშავების შესახებ, თავზარდამცემია.

19 იანვარს გახარიას წერილით მიმართა რესპუბლიკელმა კონგრესმენმა, მარკუეინ მალინმა, და მთავრობას მოუწოდა, შეწყდეს მტრული დამოკიდებულება ამერიკული კომპანიების მიმართ. მალინი წერილში წერდა, რომ ის შეშფოთებულია საქართველოს დემოკრატიული ღირებულებებისგან განგრძობადი გადახვევითა და ეკონომიკური გაუარესებით. ამ წერილით კონგრესმენი მისი კოლეგების, კინზინგერისა და კონოლის, კრიტიკულ წერილს შეუერთდა.

მალინის წერილს მალევე, 21 იანვარს კიდევ ერთი წერილი დაემატა, რომელსაც ხელს აწერდნენ რესპუბლიკელი და დემოკრატი კონგრესმენები, ადამ კინზინგერი, ჯერი კონოლი, ელიოტ ენგელი და მაიკლ მაკკაული. წერილში კონგრესმენები შეშფოთებას გამოთქვამდნენ დემოკრატიული რეფორმის ჩაგდებისა და თანმხლები ძალადობის გამო მშვიდობიანი დემონსტრანტების წინააღმდეგ.

კონგრესმენების განცხადებით, ასევე საგანგაშოა ანაკლიის ღრმაწყლოვანი პორტის პროექტის პოლიტიზირებაც. წერილში აღნიშნული იყო, რომ ისინი შეწუხებულები არიან პროკურატურის მიერ ქართული ოცნების ოპონენტების წინააღმდეგ დაწყებული, თუ განახლებული საქმეებით.

25 იანვარს ენმ-მ გახარიას მიმართ მიწერილი კიდევ ერთი წერილი გაასაჯაროვა, რომელიც 19 დეკემბრითაა დათარიღებული. წერილის ავტორი ამჯერად ჰელსინკის კომისიის სენატორი როჯერ ვიკერი იყო.

წერილში ნათქვამია, რომ ხელისუფლებამ უნდა მიიღოს მისაღები საარჩევნო სისტემა, რომელიც უზრუნველყოფს თამაში თანაბარ წესებს ყველასთვის, წინააღმდეგ შემთხვევაში - არჩევნების ლეგიტიმაცია შემცირდება.

30 იანვარს საქართველოს მთავრობას ვაშინგტონიდან მორიგი წერილი გამოუგზავნეს. ამჯერად წერილის ავტორები აშშ-ის სენატის საგარეო ურთიერთობათა კომიტეტის თავმჯდომარე ჯეიმს რიში და კომიტეტის წევრი სენატორი ჯინ შაჰინი იყვნენ, სადაც ისინი წერდნენ, რომ თუკი პროცესები საქართველოში ასე გაგრძელდება, "ამერიკა შეიძლება, იძულებული გახდეს, საქართველოსთან პარტნირობას გადახედოს". 

ტეხასელმა კონგრესმენმა პიტერ ოლსონს მართალია გახარიასთვის წერილი არ მიუწერია, თუმცა Twitter-ის ოფიციალურ გვერდზე დაწერა, რომ "ქართველი ხალხი კორუმპირებულ მთავრობაზე უკეთესს იმსახურებს".

28 იანვარს კი კონგრესში სიტყვით გამოსვლის დროს ოლსონმა ბიძინა ივანიშვილი ამერიკული სატელევიზიო შოუს პერსონაჟს გრაუჩი ოსკარს შეადარა და მას ვლადიმერ პუტინის მარიონეტი უწოდა.

31 იანვარს საქართველოში მიმდინარე პროცესს კონგრესმენი უილ ჰარდიც გამოეხმაურა და დაწერა, რომ ის მოხარულია იმ ფაქტით, რომ "თავისუფლების მოყვარულ ქართველ ხალხს", რომლებიც ხელისუფლებისგან დაპირებული დემოკრატიული რეფორმის მიღებას ითხოვენ, აშშ-ის კონგრესში ორპარტიული მხარდაჭერა აქვს.

დასაკომენტარებლად გთხოვთ გაიაროთ ავტორიზაცია/რეგისტრაცია